සමනළ පියසින් පහස ලැබ සුනිල දිය දහරින් පෝෂිත මහවැලි නදිය මෙම භූමිය හරහා සුන්දර ලාලිත්‍යයකින් ගලාබසී. බුවනෙක රජ දවස සිරිපා නමස්කාරයට මෙම භූමිය හරහා වන්දනාකරුවන් ගමන් කල අතර ඔවුන්ගේ සුබසාධන අවශ්‍යතාවය සඳහා එකල ගම්පොළ රාජධානිය රජ කළ බුවනෙකබා රජතුමා විසින් මාර්ගය සනිටුහන් කිරීම සඳහා ගව්වෙන් ගව්ව බෝධි වෘක්ෂ රෝපණය කරන ලදි. මේ බව අඹගමුව ඓතිහාසික සෙල්ලිපියෙන්ද සනාථ වේ. මෙරට විදේශීය ආක්‍රමණයත් සමඟ සිදු වූ සමාජ, ආර්ථික ප්‍රගමනයන් නිසා කෝපි, රබර්, තේ, සිංකෝනා, කොකෝවා වැනි බෝග වානිජ වැවිල්ලක් ලෙස මෙරට ආර්ථීකය පෝෂණය කල යුගයේ පස්බාගේ කෝරළේ ප්‍රදේශයද ප්‍රබල නායකත්වයක් ලබා දී ඇත. සුන්දර තේ වතු, දර්ශනීය දියඇලි, විශ්මිත ජෛව පද්ධතියකට හිමිකම් කියන මෙම පරිශ්‍රය සංචාරක ආකර්ශණීය භූ විෂමතා වලින් අනූනය. එකිනෙක පරයන කඳු ශිඛර නරඹන්නන් වශී කරයි. බහු ආගමික ඇදහිලි පසුබිමකට හිමිකම් කියන සාමකාමි ජනතාවක් වෙසෙන මෙම ප්‍රදේශය විශ්මිත අනන්‍යතාවයකින් යුක්තය.